mersol: Steve Jobs eftir Walter Isaacson

Var að klára Steve Jobs eftir Walter Isaacson. Varð spenntur fyrir henni þar sem ég hafði áður lesið bókina um Einstein eftir sama höfund sem mér fannst frábær. Bókin sem slík er góð. Ekki frábær en samt góð. Kannski ágætur mælikvarði að þrátt fyrir að hún sé um 600 bls. tók það bara 3 vikur að klára hana. Hún er allavega það góð að það er skemmtilegt að sökkva sér í hana.

Áhugaverðust fannst mér sagan af upphafi tölvubyltingarinnar í Sílikon dalnum þar sem nördalegir áhugamenn um rafmagnstæki enduðu á að leiða merkilega lífsháttabyltingu tölvualdarinnar. Það var líka áhugavert hvernig persónubrestir Jobs urðu til þess að honum var hennt út úr sínu eigin fyrirtæki á miðjum níunda áratugnum. Og hvernig þessir brestir slípaðir af þroska hækkandi lífára leiddu hann til nýrra sigra og ótrúlegrar endurkomu á miðjum tíunda áratugnum og fram á okkar daga. Minna áhugaverðar þóttu mér full nákvæmar vörulýsingar á vörum sem eru það nálægt í tíma að þær þekkir hver maður án þess að þeim sé lýst í smáatriðum.

Sem persóna þá virðist það ekki hafa verið nokkrum vafa undirorpið að hann var svo gott sem 100% skíthæll. Kom illa fram við fólk, öfundaðist út í keppinauta svo jaðraði við þráhyggju, var drembinn og sjálfselskur, hefnigjarn og langrækinn, og svona mætti lengi telja upp það sem fæstir vilja láta kenna við sig. Svo langt gengur það að hann virðist nánast hafa notað síðustu andadrættina til að hnýta í Bill Gates sem honum fannst vera auli, og Microsoft sem bjó einungis til drasl vörur að hans mati. Hljómar vissulega meira eins og lýsing á ofdekruðu barni heldur en á stjórnanda verðmætasta tæknifyrirtækis heims.

Þrátt fyrir þessa stórkostlegu bresti náði hann samt að afreka merkilega hluti í gegnum sérstakar gáfur sem hann hafði til að bera. Hann virðist hafa haft ótrúlegan sannfæringarkraft sem nýttist honum vel í að fá fólk til að gera hluti fyrir sig sem fólk vissi jafnvel ekki að það væri fært um að gera. Hann hafði góðan smekk og sérstakt auga fyrir fegurðinni, allt frá hinu agnarsmá yfir til afstæðs samhengis hlutanna. Hann hafði ímyndunarafl til að hugsa öðruvísi og lengra. Kjarkinn og hrokann til þess að fylgja sýn sinni eftir með harðri hendi í fullkominn vissu um að hann hefði rétt fyrir sér en að allir aðrir hefðu á röngu að standa, og það sem var mikilvægast, að fá alla í kringum sig til að hjálpa til við að láta hugmyndirnar fæðast.

Mikið er gert úr hugmyndafræði hans um yfirburði lokaðrar tækni Apple þar sem þeir stjórnar öllu í kringum vöruna allt frá tækinu og hugbúnaðinum, til upplifunar og notkunar neytandans á henni. Mottóið hjá honum var að með stjórnun á öllu væri alltaf hægt að búa til betri vöru og upplifun fyrir neytandan þar sem allt passaði fullkomlega saman. Andstæðan er svo Microsoft og Google sem skrifa bara hugbúnað og leyfa öllum sem vilja nota hann á tækin sem þeir smíða með þeim afleiðingum, samkvæmt Jobs, að bæði varan og upplifunin af notkuninni eru ömurleg. Ég hallast nú svolítið að því sem haft var eftir Bill Gates í bókinni um að lokað kerfi hafi virkað ágætlega með Jobs við stjórnvölinn, en koma yrði í ljós að honum gengnum hvort þeir yrðu margir slagirnir sem sú hugmyndfræði hefði betur í.